برا صرفه حديد و اشري بيه واحد طعميه و إقسمها على الجماعة ...

الـــــســــــلام عـــــلــــيــــكــــــم و رحــــمــــــة الله و بــــــركــــــاتـــــــــه

خــــــيــــــر عــــــلـــيـــــكـــــــم كـــــلــــكـــــم مـــــــع بـــــــعــــــــــض



خيرك تضحك يا بنادم



تي خيرك تضحك يا بنادم تكلم



تي يا ودي خيرك تضحك تكلم يا راجل



بتتكلم ولا ننصبها معاك للسمي توا



نضحك نضحك على الجكاتوري يلي وراك برا برا صرفه حديد و أشري بيه واحد طعميه و إقسمها على الجماعة



تي شنو تقول انت علي أما جيكاتوري تتكلم



تي غير شوف وراك و توا تعرف ولا انقولك دير باص أعيون جانبية و شوف الجكترة على أصولها

( طبعاً هده ما تسمي بالباص عيون الجانبية الخت فتية )







أوووووووووس و فوته برابعه و خليه يتجكتر و خلينا في موضوعنا أحني توا



و انت شنو موضوعك يا مارشا



انا موضوعي موضوع .. انا توا نكلم فيك و متعفلق و واحيد و زعلان و متشائم و حيران و مهموم و متضايق و مستاء و غضبان

و كائيب و منكمد و منكسر و متألم و مغموم و مغلول و وجهي أحمر و قلبي يدق بسرعة



خيرك يا مارشا ان شاء الله خير ليش متعفلق و واحيد و زعلان و متشائم و حيران و مهموم و متضايق و مستاء و غضبان

و كائيب و منكمد و منكسر و متألم و مغموم و مغلول و وجهك أحمر و قلبك يدق بسرعة



أمس مشيت مع واحد صاحبي لواحد صاحبه عنده حالة وفاة جده .. و أحني مقعمزين على الكراسي جي صاحب صحبي يوزع علينا في الشاهي

و كيف بيمدلي الشاهي قولتله لا مانبيش صحيت منور مانبيش

مشي قالى خود يا راجل .. قولتله والله ماني واخد مانبيش ,, قالى والله لما تاخد و ناضو صحابي يلي في جنبي خود يا راجل خيرك متحشم

ما تردش الراجل .. مشيت خديت هديكة طاسة الشاهي و شربتها .



باهي و شنو المشكلة في شربتك في الشاهي



المشكلة حلفت عليها و قولتله والله ماني واخد و مانبيش و بعدين على عيون الشباب خديتها و شربتها



تي عادي يا راجل تحملهم الثلاثة أيام أهما و صيمهم و كفر على حلفتك يلي حلفتها



ماهو المشكلة حتى أول أمس



خيرك أول أمس يا مارشا و انت ديما بمواضيعك و مواضيعك ما تكملش



أول أمس مشيت للمدينة درت فيها دورة .. و انى مروح من المدينة ركبت في الأفيكو و طلع يلي يسوق فيها واحد صاحبي

و لما وصلت للمكان يلي بننزل فيه مديتله ربع دينار .. قالى تي انزل يا راجل والله ماني واخده منك .. قولتله تشد يا راجل والله لما تاخده

هوا يحلف و انى نحلف و في الأخير ما باش ياخده و صكر راسه



تي باهي شنو المشكلة ما اخداش الربع ,, حصل خير و اهو الربع دينار قعدلك .



تي المشكلة مش في الربع يا بنادم ,, المشكلة في الحلفة يلي حلفتها و قولتله والله لما تاخده و في الأخير ما اخداشي



تي عادي يا راجل جاتك في 3 أيام صيام زيادة على الـ 3 أيام متع الشاهي مش مشكلة 6 أيام



ماهو المشكلة حتى أول أمستين



شنو فيه أول أمستين ان شاء الله خير



أول أمستين الكمبيوتر متعي الويندوز متعه انضربت و يبي فورمات و صبان ويندوز



باهي و الشنو المشكلة فورمه و صبله ويندوز .



المشكلة مش في الفورمات و مش في صبان الويندوز يا بنادم

المشكلة اني تعفلقت منه في وقتها و قولت لروحي والله العظيم معاد ماسه و معاد امفورمه ولا صابله ويندوز

و بعدها بيوم كسدت و لقيت روحي واخد دسكت الويندوز و مفورمه و صابله ويندوز .



تي باهي هاك حليت مشكلتك و صبيتله ويندوز وين المشكلة .



المشكلة ان انا حلفت اعليه مش حنفورمه ولا انصبله ويندوز و بعدها بيوم فورمته و نظمتله أموره .



زيد على الـ 6 الأولات 3 أيام ..معنها توا عندك 9 أيام صيمهم و أجرك على الله



تي ماهو المشكلة حتى أول 3 أمسات



ايوا ايوا ايوا انت حكايتك حكاية يا مارشا


أنقولك حاجة تشوف فيه هداكة الجكاتوري برا أحكيله و حيساعدك و حيقولك مش لازم الصيام لأنك حالف من غير قصد .

لكن كان بتقعد معاى حنتعبك و حتمشي السنة كلها صيام في جرة قصصك الحلفانية يلي مش حتكمل




الموضوع بما فيه كوميدي ساخر لحياتنا اليومية

نجد أنفسنا نحلف بالله حانت و نحن لا نشعر بانفسنا اننا نحلف و نمشو في الامور كيف ما تمشي تمشي


 

مــــع تــــــــــحــــــــيــــــاتــــــــي لــــــكـــــــم ... مارشا